Texnologiya kelajagi prognozi

Muallif: Sanjarbek Sobirjonov       62       2020-02-21/19:30:04


Google korporatsiyasining texnik direktori va texnofuturist Rey Kurtsveyl 1990-yillardan texnologiyalar olami kelajagi borasidagi taxminlari bilan bo‘lishib keladi. U sun'iy intellekt sohasidagi zamonaviy yutuqlarning yetakchi tadqiqotchisi sifatida ishonchli prognozlarni tuzadi, ularning aksariyati hatto ilmiy gepoteza maqomini olishga ulgurgan.

Kurtsveylning so‘nggi 20 yilda kitoblar, bloglar, intervyular va maruzalardagi barcha prognozlari to‘plansa, 2019-2099 yillarga doir kelajak kartinasini tasavvur qilish mumkin. EarthChronicles shu haqidagi malumotlar bilan bo‘lishdi. 

2019 yil: Shaxsiy qurilmalarning sim va kabellari o‘tmishda qoladi.

2020 yil: Shaxsiy kompyuter inson miyasiga monand hisoblash qudratiga erishadi.

2021 yil: Yer hududining 85 foizi simsiz internetga ulanish imkoniga ega bo‘ladi.

2022 yil: AQSh va Yevropada odamlar va robotlarning munosabatlarini tartibga soluvchi qonunlar qabul qilinadi. Robotlar faoliyati, ularning huquq va majburiyatlari hamda boshqa cheklovlar aniq belgilab qo‘yiladi. 

2024 yil: Avtomobillardagi kompyuter intellekti elementlari majburiy bo‘ladi - odamlarga aqlli yordamchi bilan taminlanmagan mashinaga o‘tirish taqiqlanadi.

2025 yil: Ommaviy bozorda implant-gadjyetlar paydo bo‘ladi. 

2026 yil: Ilmiy taraqqiyot tufayli inson hayoti uzayishi mumkin.

2027 yil: Murakkab xatti-harakatlarni to‘liq mustaqil bajarishga qodir personal robot muzlatgich yoki qahva qaynatgichdek uskunaga aylanadi. 

2028 yil: Quyosh energiyasi shu qadar arzonlashadiki, insoniyatning barcha energetik ehtiyojlari qoniqtiriladi. 

2029 yil: Kompyuter aqliy salohiyatini isbotlab, Tyuring testini yechishni uddalaydi. Inson miyasini kompyuterda modellashtirish natijasida shunday imkoniyat yuzaga keladi. 

2030 yil: Sanoatda nanotexnologiyalarning gullab-yashnash davri va o‘z navbatida, barcha mahsulotlarning ishlab chiqarish xarajatlarining kamayishi kuzatiladi.

2031 yil: Barcha shifoxonalarda inson organlarini bosmadan chiqarish uchun 3D-printerlar paydo bo‘ladi. 

2032 yil: Nanorobotlar tibbiy maqsadlarda qo‘llaniladi: ular ozuqaviy moddalarni hujayralarga yetkazib, chiqindilarni yo‘qotadi. Bundan tashqari, ular inson miyasini batafsil skanerlaydi, bu uning qanday ishlashini yaxshiroq tushunishga yordam beradi. 

2033 yil: Yo‘llarda faqat avtonom mashinalar harakatlanadi. 

2034 yil: Suniy intellektli birinchi inson paydo bo‘ladi: xuddi "U" filmidagidek, faqat undan-da yaxshiroq. 

2035 yil: Kosmik texnika rivoji Yerni asteroid tahdididan himoyalash imkonini beradi. 

2036 yil: Biologiya rivoji kasalliklarni davolash uchun hujayralarni dasturlash va 3D-printer yordamida yangi to‘qimalar va organlarni yetishitirish imkonini beradi. 

2037 yil: Inson miyasi sirlarini anglab yetishda ulkan siljish kuzatiladi, yuzlab ixtisoslashgan funksiyalarga ega submintaqalar aniqlanadi. Bu sohalar rivojini kodlovchi algoritmlarning ba`zilari shifrlanadi va kompyuter neyron tarmoqlariga kiritiladi. 

2038 yil: Robotlashtirilgan odamlar, transgumanistik texnologiyalar mahsulotlari paydo bo‘ladi. Ular qo‘shimcha intellekt (masalan, muayyan sohada inson miyasi qodir bo‘lmagan bilimlarga ega bo‘lish) va ko‘plab implantatlar (ko‘zdagi kameradan to qo‘shimcha qo‘l protezigacha) bilan jihozlangan bo‘ladi.

2039-yil: Nanomashinalar bevosita inson miyasiga joylanadi va uning hujayralari bilan signal almashish imkonini beradi. Natija - qo‘shimcha uskunalarni talab qilmaydigan virtual reallikka "sho‘ng‘ish". 

2040 -yil: Qidiruv tizimlari inson tanasiga joylangan gadjyetlarda paydo bo‘ladi: qidiruv fikrlar orqali (so‘zlar aralashuvisiz) amalga oshiriladi. Natijalar linzalar yoki ko‘zoynaklar ekranlarida aks etadi. 

2041 -yil: Internet tarmog‘ining ishlashi bugungidan 500 million marta tezlashadi.

2042 -yil: Immun tizimini to‘ldiruvchi va organizmni kasalliklardan "tozalovchi" nanorobotlar armiyasidan foydalanish yordamida barhayotlik imkoni paydo bo‘ladi.

2043 -yil: Nanorobotlar ko‘pligi tufayli inson organizmi har qanday shaklni qabul qilish xususiyatiga ega bo‘ladi. Ichki organlar yuqori sifatli kibernetik qurilmalarga almashtiriladi. 

2044 -yil: Nobiologik intellekt biologik intellektdan milliard martalab "aqlli"lashadi. 

2045 -yil: Texnologik singulyarlikning boshlanishi. Yer ulkan bir kompyuterga aylanadi. 

2099- yil: Texnologik singulyarlik butun Koinotga taraladi.

Bunday prognozlarga ishonish qiyin, biroq texnologiyalar rivojining katta tezligini inobatga oladigan bo‘lsak, bularning imkoni bor. Omon bo‘lsak ko‘rarmiz InshaAlloh...